Солтүстік Кореяның мемлекеттік “KCNA” ақпарат агенттігінің хабарлауынша, мемлекет басшысы Ким Чен Ын Ресей Қорғаныс министрі Андрей Белоусовпен халықаралық саяси жағдайды талқылағаннан кейін өз елінің Ресей саясатын қолдауды жалғастыратынын мәлімдеді.
Андрей Белоусов бастаған делегация Солтүстік Кореяда өткен Ресейдің Курск облысындағы соғыста қаза тапқан корей сарбаздарын еске алу рәсіміне қатысты.
Рәсімде сөйлеген сөзінде Ким: «Солтүстік Корея үкіметі егемендігін, аумақтық тұтастығын және қауіпсіздік мүдделерін қорғау мәселесінде Ресейдің саясатын толық қолдауды жалғастырады», — деді.
Екі ел 2024 жылы өзара қорғаныс келісіміне қол қойған болатын. Солтүстік Корея Курск аймағында ресейлік күштермен бірге Украинаға қарсы соғысу үшін шамамен 14 000 сарбаз жіберді. Оңтүстік Корея, Украина және Батыс ресми өкілдері қақтығыстарда 6 000-нан астам солтүстіккореялық сарбаздың қаза тапқанын хабарлады.
Қарым-қатынастар тереңдеп келеді
Ким Ресей парламентінің төрағасы Вячеслав Володинмен де кездесіп, стратегиялық серіктестік келісімі аясында екіжақты байланыстарды тереңдету ниетін қайталады. Бұл бағыт Ресей президенті Владимир Путиннің жолдаған хатында да көрініс тапты: «Ресей мен Солтүстік Корея ортақ күш-жігермен жан-жақты стратегиялық серіктестікті нығайтуды жалғастырады».
Ким Курск облысында соғысқан сарбаздарды жанқиярлық пен адалдықтың символына айналдыру үшін жүйелі қадам басуда. Жексенбі күні мемориал алдында өз қолымен жазған хабарламасында Ким: «Шейіттердің рухы олар қорғаған ұлы абыроймен бірге мәңгі жасайды», — деп атап өтті.
