Министрлік Хезболла мен Израиль арасындағы бітімге қарамастан, елдің оңтүстігіне жасалған шабуылдарда 14 адамның көз жұмғанын мәлімдеді. Сондай-ақ қаза тапқандардың ішінде екі әйел мен екі баланың бар екенін растап, 37 адамның жараланғанын жеткізді.
Ливанның мемлекеттік ақпарат агенттігі Израиль армиясының оңтүстіктегі Ярун және Бинт Джубейль елді мекендерінің арасындағы үйлер мен инфрақұрылымды нысанаға алып, қиратқанын хабарлады.
Агенттіктің мәліметінше, Израиль күштері Сур аймағындағы Бурдж Каллавие елді мекеніне әуе соққысын жасап, сол өңірдегі Мансури және Бейт ас-Сейид елді мекендерін атқылаған. Сондай-ақ Израиль Арнун елді мекенін және Али әт-Тахир орман алқабын нысанаға алды.
Израильдің әскери ұшақтары сол аймақтағы Завтар әл-Шаркия елді мекеніне де әуе шабуылдарын жасап, бір мешіт пен діни іс-шараларға арналған залды қиратқан.
Агенттік дерегіне сәйкес, Израиль күштері Бейт Яхун елді мекенін нысанаға алып, Бурдж Каллавиеге үш, Кафра елді мекеніне бір және Жубаль әл-Бутым мен Садыкин арасындағы аймаққа бір әуе соққысын жасаған.
Израильдің заңбұзушылықтары жалғасуда
Хезболла келісімді бұзғандарына үшін Израильге шабуылдағанын мәлімдеді.
17 сәуірде күшіне енген 10 күндік бітім үш аптаға ұзартылғанына қарамастан, Хезболла: «Израильдің бітімді бұзуды, шабуыл жасауды, үйлерді қиратуды және Ливан аумағын басып алуды жалғастыруына жауап берілетінін мәлімдейміз», - деді.
Ұйымның мәліметінше, Израиль 17 сәуірден бері бітімді 500 рет бұзған.
Хезболла «Бітімнің апта сайын ұзартылуы бейбітшілікке жол ашуы тиіс еді», - деп мәлімдеп, керісінше Израильдің шабуылдарының күшейгенін атап өтті.
Ал Израиль армиясы Ливанның оңтүстігіндегі қақтығыстарда бір сарбаздың қаза тауып, алты сарбаздың жараланғанын хабарлады.
Израиль 2 наурызда Ливанға әуеден соққы беріп, құрлық операциясын бастаған болатын.
Ливан билігінің мәліметінше, Израиль шабуылдарынан 2 500-ден астам адам қаза тауып, 1 миллионнан астам адам босқынға айналған.
