Индонезияның Батыс Ява уәлаятындағы Бекаси қаласында екі пойыздың соқтығысуы салдарынан қаза тапқандар саны 14-ке, ал жараланғандар саны 84-ке жетті. Мемлекеттік БАҚ бұл оқиғаның соңғы жылдардағы ең ірі теміржол апаттарының бірі болғанын хабарлады.
“Antara” ақпарат агенттігінің мәліметінше, апат дүйсенбі күні кешке Шығыс Бекаси станциясында қала маңына қатынайтын пойыздың алыс қашықтыққа арналған пойызбен соқтығысуы нәтижесінде болған. Мемлекеттік «PT Kereta Api Indonesia» (KAI) теміржол кәсіпорнының өкілдері жарақат алған ондаған жолаушының түрлі ауруханаларда емделіп жатқанын хабарлады.
“Jakarta Globe” басылымының жазуынша, “КAI” баспасөз хатшысы Франот Вибово оқиға Бекасидегі Булак Капал теміржол өткелінде таксидің электрлі пойызбен соқтығысуынан басталғанын айтты. Соқтығысудан кейін қала маңына қатынайтын пойыз рельс үстінде тоқтап қалған, көп ұзамай дәл сол жолмен келе жатқан алыс қашықтыққа арналған пойыз тоқтап тұрған пойызға соғылған.
Ұлттық іздестіру және құтқару агенттігі (Basarnas) бастаған шұғыл әрекет ету топтары түні бойы зардап шеккендерді эвакуациялау жұмыстарын жүргізді. Билік қаза тапқандардың жеке басын анықтау үшін мәйіттерді полиция ауруханасына жеткізді. Мемлекет зардап шеккендердің барлық медициналық және жерлеу шығындарын өз мойнына алатынын, сондай-ақ отбасыларға көмектесу үшін ақпараттық орталықтар құрылғанын мәлімдеді.
Апат болған аймақта пойыз қозғалысы ішінара шектелген. Тергеу топтары соқтығысудың егжей-тегжейін анықтау үшін жұмыс істеп жатыр, ал транспорт қызметкерлері үйінділерді тазарту және құтқару операцияларының жалғасып жатқанын хабарлады.
