Ақпаратқа қарағанда, Израиль президентін екі күндік сапармен Қазақстанға алып бара жатқан ұшақ Түркия әуе кеңістігін әдейі айналып өтіп, межелі жерге жету үшін сегіз сағаттық бағытты таңдаған.
Израильдің «Chanel 12» арнасы ұшақтың Түркия әуе кеңістігіне кірмеу үшін Еуропа мен Ресей арқылы ұшқанын, салдарынан сапар уақыты сегіз сағатқа дейін ұзарғанын хабарлады.
Герцог «X» желісіндегі парақшасында Астана қаласына қонғанын растады.
Түркия 2024 жылдың қарашасында Герцогтың Бакуде өткен «COP29» саммитіне ұшу үшін әуе кеңістігін пайдалануға рұқсат бермеген болатын. Сол кезде Герцог қауіпсіздік мәселелерін алға тартып, сапарын кейінге қалдырған еді.
Израильдің Газа секторына қарсы жүргізген соғысы салдарынан Түркия мен Израиль арасындағы қатынастар күрт нашарлады. Кейін бұл қақтығыс Ливан мен Иранды да қамтыды.
