Иран бұқаралық ақпарат құралдары сейсенбі күні Израиль мен АҚШ-тың екі газ нысаны мен бір құбырды нысанаға алғанын хабарлады. Бұл мәлімет АҚШ президенті Дональд Трамптың энергетикалық инфрақұрылымға соққы беруден бас тартқан мәлімдемесінен бірнеше сағат өткен соң тарады.

«Фарс» ақпарат агенттігі «Сионистік және америкалық жаудың жалғасып жатқан шабуылдарының бір бөлігі ретінде Исфахандағы Каве даңғылында орналасқан газ басқармасының ғимараты мен газ қысымын реттеу станциясы нысанаға алынды», — деп хабарлады.

Агенттік Ирандағы бұл нысандардың «ішінара зақымдалғанын» білдірді. Ақпарат көзін көрсетпеген бұл агенттік оқиғаны хабарлаған жалғыз БАҚ болды. Сонымен қатар агенттік елдің оңтүстік-батысындағы Хорремшехр электр станциясының газ құбыры да шабуылға ұшырағанын мәлімдеді.

«Фарс» агенттігі Иракпен шекарадағы қаланың әкіміне сілтеме жасай отырып, «Снаряд Хорремшехр газ құбырын өңдеу станциясының сыртқы аймағына келіп құлады», — деп хабарлады. Әкім инфрақұрылымның қалыпты жұмыс істеп тұрғанын және газ жеткізуде ешқандай үзіліс болмағанын айтты.

Трамп дүйсенбі күні “AFP” агенттігіне Иранмен «істер өте жақсы жүріп жатқанын» айтқан болатын. Бұл мәлімдеме Тегеранмен келіссөз жүргізу және Ислам Республикасының энергия станцияларын нысанаға алмау туралы бес күндік үзіліс жариялағаннан кейін жасалды.