“Washington Post” басылымының үш дереккөзге сілтеме жасап хабарлауынша, Пентагон бастапқыда Украина үшін бөлінген қару-жарақты Таяу Шығысқа бағыттауды қарастырып жатыр.
Хабарға қарағанда, басқа өңірге қайта бағытталуы мүмкін қару-жарақтың ішінде былтыр НАТО бастамасы шеңберінде серіктес мемлекеттер Киев үшін сатып алған АҚШ-тың әуе қорғанысы жүйесіне арналған тосқауыл зымырандары да бар.
Оқ-дәрі мен әскери техниканы қайта бағыттау жөніндегі шешімді Пентагон әлі қабылдаған жоқ. Алайда сарапшылар бұл өзгеріс Иранға қарсы соғысты жалғастыру үшін қажет және күн өткен сайын ұлғайып келе жатқан ымыраларды айқын көрсететінін айтты.
Трамп әкімшілігі Пентагонның Украинаға тікелей беретін әскери көмегінің басым бөлігін қысқартты. Сондықтан қолда бар ресурстардың басқа бағытқа ауыстырылуы Украинаны шектеулі оқ-дәрі қорымен қалдыруы мүмкін.
Пентагон таратқан мәлімдемеде Қорғаныс министрлігі «АҚШ күштері мен одақтастарының соғысып, жеңіске жетуі үшін керек барлық нәрсеге ие болуын қамтамасыз етеді» делінген.
Бір АҚШ шенеунігінің хабарлауынша, қазіргі кезде Киевке әскери қолдаудың басым бөлігін еуропалық елдер көрсетіп отыр және НАТО бағдарламасы арқылы Украинаға шамамен 4 миллиард доллар бөлуге міндеттеме алған. Алайда Украинадағы соғысқа үздіксіз оқ-дәрі жеткізілімі әлі де аса маңызды мәселе болып қала бермек.
