Иранның ең жоғары қауіпсіздік органы дүйсенбі күні Тегеран іс жүзінде жауып тастаған және кемелердің өтуі үшін ақы талап еткісі келетін Ормуз бұғазын басқару мақсатында жаңа мекеме құрылғанын мәлімдеді.
Иранның Ұлттық жоғары қауіпсіздік кеңесі ресми “X” парақшасында “Persian Gulf Strait Authority (PGSA)” атты құрылым туралы жазба жариялап, оның «Ормуз_бұғазы операциялары мен соңғы оқиғалар жөнінде жедел жаңарту ұсынатынын» хабарлады.
Бұл жазбаны Ислам революциясы сақшылары корпусының әскери-теңіз күштерінің аккаунты да қайта жариялады.
Жаңа құрылымның нақты қандай қызмет атқаратыны бастапқыда түсініксіз болды. Алайда Иранның ағылшын тіліндегі “Press TV” арнасы оның Ормуз бұғазында «егемендікті жүзеге асыру жүйесі» екенін және бұғаз арқылы өтетін кемелерге info@pgsa.ir электронды поштадан «ережелер» жіберіліп жатқанын хабарлады.
Иран 28 ақпанда АҚШ пен Израиль арасындағы соғыс басталғаннан бері стратегиялық маңызы зор бұғаз арқылы өтетін теңіз қозғалысын айтарлықтай шектеді. Ал 8 сәуірден бері тұрақсыз бітім күшінде.
Иранның осы су жолын бақылауы жаһандық нарықтарды дүр сілкіндіріп, Тегеранға елеулі қысым құралына айналды. Бұған жауап ретінде АҚШ Иран порттарына қатысты өз теңіз блокадасын енгізді.
Бейбіт кезеңде бұл бағыт арқылы әлемдік мұнай мен сұйытылған табиғи газ тасымалының шамамен бестен бірі, сондай-ақ тыңайтқыш секілді басқа да маңызды тауарлар жеткізіледі.
Соғыс басталғалы бері Иран бұғаз арқылы өтетін теңіз қозғалысы «соғысқа дейінгі жағдайға қайтып оралмайтынын» бірнеше рет мәлімдеп, өткен айда осы су жолынан алынған алғашқы транзиттік төлем кірісін алғанын хабарлаған еді.
Сенбі күні Иран парламентінің ұлттық қауіпсіздік комиссиясының төрағасы Ибрахим Азизи Иранның бұғаздағы қозғалысты басқару үшін «кәсіби механизм әзірлегенін» және оның «жақын арада жарияланатынын» айтты.
