Украина президенті Владимир Зеленский АҚШ президенті Дональд Трамппен бірге Ресей президенті Владимир Путинмен кездесуге дайын екенін мәлімдеді.
БҰҰ Бас Ассамблеясының 81-сессиясына қатысу үшін Нью-Йоркке барған Украина президенті Зеленский АҚШ президенті Дональд Трамппен екіжақты кездесуден кейін баспасөз мәслихатын өткізді.
Зеленский Украина мен Ресей арасындағы соғысты мүмкіндігінше тезірек аяқтау қажеттігін айтып, «Меніңше, бәріміз мүмкіндігінше тезірек әрекет етуіміз керек», – деді.
Зеленский 2022 жылғы ақпаннан бері жалғасып келе жатқан Ресей-Украина соғысын аяқтау үшін ел басшыларының кездесуі қажет екенін атап өтті.
Ресей президенті Владимир Путинмен кездесуге дайын екенін айтқан Зеленский Трамптың АҚШ, Ресей және Украина басшыларының саммитін ұйымдастыру бойынша жұмыс жүргізе алатынын білдірді.
Украина президенті мұндай кездесу өткен жағдайда үш елдің басшылары соғысқа қатысты ең маңызды мәселелерді талқылай алатынын айтып, «Үшжақты кездесуге дайынмын, бірақ Путин бұған дайын деп ойламаймын. Ол соғысты аяқтауға дайын емес», - деді.
Зеленский кездесуде соғыс аясында энергетикалық бітімге қол жеткізу мәселесі де талқыланғанын айтып, «Егер Ресей біздің энергетика секторымызды нысанаға алмаса, біз энергетикалық бітімге дайынбыз», - деді.
Зеленский мұндай бітімге қол жеткізу үшін Украинаның ұсыныстарын АҚШ Ресейге жеткізетінін хабарлады.
Сондай-ақ Зеленский “Patriot” әуе қорғанысы жүйесінде қолданылатын зымырандарды өндіруге қажетті лицензияны бұған дейін АҚШ-тан сұратқанын еске салып, осы мәселе бойынша америкалық тиісті лауазымды тұлғалармен жұмыс жалғасып жатқанын айтты.
