17 қазандағы зорлық-зомбылық оқиғаларынан кейін билік қауіпсіздік шараларын күшейтті. Нәтижесінде бұл жолғы наразылық шерулері негізінен бейбіт жағдайда өтті.
Алайда Ренн, Нант, Лион және Марсель сияқты қалаларда полиция мен наразылық білдіруші топтар арасында қақтығыс болды.
Франция Ішкі істер министрлігі наразылық акциялары кезінде 448 адамның ұсталғанын және ел бойынша 86 өрттің сөндірілгенін хабарлады.
Ереуілдердің мемлекеттік қызметтердің жұмысына әсері
Наразылық акциялары аясында студенттер, мұғалімдер, пошта және көлік қызметкерлерінің мүддесін қорғайтын көптеген кәсіподақ бүкіл ел бойынша ереуілге шығуға шақырды. Үкімет мәліметінше, жоғары оқу орындарының шамамен үштен бірінде оқу жұмысы қалыпты жүргізілмей, мектеп қызметкерлерінің 13 пайызы ереуілге қатысты.
Теміржол қатынасында да кейбір іркілістер байқалды. Ал Францияның Денсаулық сақтау министрлігі медицина қызметкерлерінің тек 5 пайызы ереуілді қолдағанын және медициналық қызмет көрсетуде ешқандай іркіліс болмағанын мәлімдеді.
Наразылық білдірушілердің талаптары мен шеруге қатысқан топтар
Студенттерден бастап кәсіподақтар мен «Сары кеудешелілер» қозғалысына дейін мыңдаған адам қатысқан шерулерде түрлі талаптар қойылды. Кәсіподақтар жалақы мен зейнетақыны арттыруды талап етуде. Елдегі жетекші кәсіподақтардың бірі CGT ең төменгі жалақыны дереу 10 пайызға көтеруді талап етсе, CFDT кәсіподағы ай сайынғы ең төменгі жалақыны 100 еуроға арттыруды сұрап отыр.
Студенттік топтар білім беру саласына бөлінетін бюджетті ұлғайтуды және мектептердің инфрақұрылымына инвестиция салуды талап етсе, «Сары кеудешелілер» қозғалысы Франция президенті Эммануэль Макрон мен оның үкіметінің отставкаға кетуін талап етуде.
Наразылық шерулері жалғасады деп болжануда
Наразылық білдірушілер акцияларын Жаңа жылға дейін және келесі көктемде өтетін президенттік сайлауға дейін жалғастыруды жоспарлап отыр.
Франция президенті Эммануэль Макрон жастардың талаптары ескерілгенін айтып, мектептердегі оқу процесіне кедергі келтірмеуге және тыныштық сақтауға шақырды.
