Сот жүйесіне қарасты “Mizan Online” сайтының хабарлауынша, «Мохаммад Масум-Шахи мен Хамед Валидиге кесілген өлім жазасы бүгін таңсәріде орындалды».
Хабарда бұл екі адамның да «Израиль барлау агенттігі Моссадпен байланысы бар тыңшылық желісінің мүшелері» екені айтылған. Алайда олардың қашан ұсталғаны туралы мәлімет берілмеді.
“Mizan Online” сайтының мәліметінше, екеуі де «мохаребе», яғни «Аллаға қарсы соғыс ашу» деп сипатталатын өлім жазасына әкелетін айып бойынша, сондай-ақ «жау топтармен және сионистік режиммен ынтымақтасу» бабымен кінәлі деп танылған.
Иран 28 ақпаннан бері, яғни АҚШ және Израильмен соғыс басталғаннан кейін бірнеше адамға өлім жазасын кесті.
Халықаралық адам құқықтарын қорғау ұйымдарының мәліметіне сәйкес, Иран Қытайдан кейін әлемде өлім жазасын ең көп қолданатын екінші ел саналады.
