Иранның Кешм аралында жарылыс болғаны хабарланды. Ирандық ақпарат құралдарының мәліметінше, Ислам төңкеріс сақшылар корпусы елдің оңтүстігіндегі Кешм аралына жасалған АҚШ шабуылынан кейін Кувейттегі америкалық әскери базаларды нысанаға алған қарымта шабуылдардың басталғанын жариялады.
Ислам төңкеріс сақшылар корпусы мәлімдемесінде Кешм аралында Иранның егемендігі бұзылғанына жауап ретінде Әуе-ғарыш күштері Кувейттегі АҚШ әскери нысандарына зымырандық соққы бергені хабарланды. Мәлімдемеде Иранға қарсы жаңа шабуылдарға «батыл әрі нақты» жауап берілетіні ескертіліп, Иранға қарсы әрекеттерге қатысқан күштер ауыр салдарға тап болатыны атап өтілді.
Ал АҚШ Орталық қолбасшылығы Кешм аралына жасалған шабуылдарды растады. CENTCOM-ның “X” әлеуметтік желісіндегі мәлімдемесінде: «АҚШ күштері Иранның Таяу Шығыс аумағындағы шабуыл әрекеттеріне жауап ретінде 2 маусым күні көптеген ирандық баллистикалық зымыран мен ұшқышсыз ұшу аппараттарын жойды, сондай-ақ өзін-өзі қорғау мақсатында Кешм аралында соққы берді», – делінген.
Сондай-ақ мәлімдемеде Иран тарапынан азаматтық теңіз кемелеріне бағытталған үш камикадзе-дронның атып түсірілгені және америкалық әскери қызметкерлердің зардап шекпегені хабарланды.
Кувейттің әуе қорғаныс жүйелері іске қосылды
Кувейт армиясы сәрсенбіге қараған түні әуе қорғанысы жүйелерінің «дұшпандық» зымырандар мен ұшқышсыз ұшу аппараттарының шабуылдарына қарсы әрекет еткенін мәлімдеді.
Кувейттің әскери билігі елдің әртүрлі өңірінде естілген жарылыс дыбыстары әуе қорғанысы жүйелерінің тосқауылдау шараларынан туындағанын хабарлады. Әзірге оқиғаға қатысты қосымша мәлімет жарияланған жоқ.
