Қауіпсіздік көздерінен алынған мәліметке қарағанда, Ұлттық барлау ұйымының төрағасы Ибрахим Калын Анкарада ХАМАС өкілдерімен бас қосып, жасалған келісімге байланысты жағдайды саралады.
Келіссөз барысында ХАМАС делегациясы атысты тоқтату ережелерін толық орындап отырғандарын білдіріп, Израиль тарапынан болып жатқан заң бұзушылықтар туралы Калынға мәлімет берді.
Израиль армиясының Құрбан айт мерекесі бойы Газа секторына жасаған шабуылдары кездесудің басты тақырыптарының қатарынан орын алса, кепілгер ел ретінде Түркияның Газада атысты тоқтату режимін іске асыру бағытындағы жұмыстары да тілге тиек етілді.
Сонымен қатар кездесуде Израильдің ереже бұзушылықтарына тосқауыл қою үшін басылатын қадамдар да талқыланды.
ХАМАС делегациясынан Президент Ердоғанға алғыс
Израильдің бүкіл аймақты нысанаға алған басқыншылық және тұрақсыздандыру саясатына қарсы тұру қажеттілігі баса айтылған бұл кездесуде «заңсыз әрі өз бетінше жасалған ешбір әрекетке» жол берілмейтіні ерекше атап өтілді.
Атысты тоқтатудың бірінші кезеңіне қатысты Израильдің өз міндеттемелерін орындауын қамтамасыз ету және келіссөз процесінің ілгерілеу барысы сараланған басқосуда Түркияның Газаға жеткізген гуманитарлық көмектері туралы да ақпарат берілді. Сондай-ақ аймаққа көбірек жәрдем кіргізуді қамтамасыз ету мақсатында өңір елдерімен және халықаралық ұйымдармен бірлесе атқарылып жатқан жұмыстар сөз болды.
ХАМАС делегациясы Түркияның Газада бейбітшілік орнату жолында жұмсаған күш-жігері үшін президент Режеп Тайып Ердоғанға алғысын жеткізді. Өз кезегінде Түркияның Газада тұрақты бейбітшілікті қамтамасыз ету үшін өз талпыныстарын бұдан былай да қарқынды түрде жалғастыра беретініне назар аударылды.
