Бейсенбі күні Қытайдың бұрынғы қорғаныс министрлері сыбайлас жемқорлық бойынша өлім жазасына кесіліп, жазалары екі жылға кейінге шегерілді.
Мемлекеттік Синьхуа агенттігінің мәліметінше, әскери сот Вэй Фэнхэні пара алу, ал Ли Шанфуды пара алу және пара беру ісі бойынша кінәлі деп таныды.
Екеуі де бұған дейін Орталық әскери кеңестің мүшесі әрі мемлекеттік кеңесші болған.
Сот шешіміне сай олардың барлық жеке мүлкі тәркіленеді.
Екі жылдық мерзім өткен соң үкім Қытай заңына сәйкес өмір бойы бас бостандығынан айыру жазасына ауыстырылады. Сонымен қатар Вэй Фэнхэ мен Ли Шанфу жаза мерзімін жеңілдету немесе шартты түрде босап шығу мүмкіндігінен айырылды.
