АҚШ Мемлекеттік департаменті қызметкерлерінің қауіпсіздігіне байланысты Пәкістанның Пешавар қаласындағы бас консулдығының кезең-кезеңімен жабылатынын хабарлады.

Бұл туралы АҚШ Мемлекеттік департаменті арнайы мәлімдеме жасады.

Мәлімдемеде Ауғанстанмен шекаралас Пәкістанның Хайбер-Пахтунхва уәлаятындағы Пешавар бас консулдығының қызметкерлердің қауіпсіздігі мен ресурстарды тиімді пайдалану қажеттілігіне байланысты кезең-кезеңімен жабылатыны айтылды. Сондай-ақ аймақтағы дипломатиялық байланыстардың Исламабадтағы АҚШ елшілігіне берілетіні көрсетілді.

Бұдан бөлек АҚШ-тың Пәкістанмен қарым-қатынасты жалғастыруға бағытталған қадамдарының бір бөлігі ретінде Исламабад, Карачи және Лахор қалаларындағы қазіргі миссиялары арқылы елдегі дипломатиялық миссиясын жалғастыратыны атап өтілді.