Украина президенті Владимир Зеленский жексенбі күні Киевте Германия канцлері Фридрих Мерцпен өткен келіссөздер барысында Берлиннің Украинаға шамамен 1,46 миллиард доллар көлемінде жаңа қолдау пакетін ұсынғанын мәлімдеді.
Зеленский “X” әлеуметтік желісінде жасаған мәлімдемесінде пакетке қару-жарақпен қатар қыс қарсаңында Украинаның энергетика секторына көрсетілетін қолдау да кіретінін айтты.
Украина басшысы екі елдің 15 келісім мен құжатқа қол қойғанын, олардың басым бөлігі қауіпсіздік саласындағы ынтымақтастықты, қорғаныс өндірісін, жеткізілімдерді, Германия өнеркәсібіне берілетін тапсырыстарды және Украинадағы бірлескен жобаларды қамтитынын айтты.
«Бүгін қол қойған келісімдеріміздің жалпы құны 8,5 миллиард еуродан асады», - деді Зеленский.
Ол сондай-ақ ұшқышсыз ұшу аппараттарына қарсы бірлескен күрес саласындағы ынтымақтастықты кеңейтуге бағытталған жеке келісімге де қол қойылғанын мәлімдеді.
Мерц алдын ала жарияланбаған сапар аясында жексенбі күні таңертең Украина астанасы Киевке келді.
Зеленский сондай-ақ АҚШ-тың төрт жарым жылдан бері жалғасып келе жатқан соғысты тоқтату мақсатында Украина мен Ресей арасындағы келіссөздердің жаңа кезеңіне арағайын болғысы келетінін мәлімдеді.
Украина президентінің айтуынша, Вашингтон келіссөздерді қазан айының соңына дейін өткізуді ұсынған.
«Америка тарапы қазір Украина және Ресеймен байланыста және қазан айының соңына дейін техникалық деңгейде үшжақты форматта кездесу өткізуді ұсынып отыр», – деді Зеленский журналистерге.
