Жергілікті бұқаралық ақпарат құралдары Тегерандағы тұрғын үйді нысанаға алған АҚШ-Израиль шабуылы салдарынан Иранның жоғары лауазымды тұлғасының ауыр жараланғанын хабарлады.
Мәліметтерге сүйенсек, Сыртқы байланыстар жөніндегі стратегиялық кеңестің төрағасы және бұрынғы сыртқы істер министрі Камал Харрази өз үйіне жасалған шабуылда жарақат алған. Ауыр жарақаттарына байланысты ауруханаға жеткізілген Харразидің әйелі оқиға орнында тіл тартпай кетті.
Харрази марқұм діни лидер Әли Хаменеидің аға кеңесшілерінің бірі болған. Ол жаңа діни лидер Мүжтеба Хаменеидің әкесінің тұсында қызмет еткен шенеуніктерді ауыстырмау туралы шешімінен кейін өз лауазымын сақтап қалған еді.
АҚШ пен Израиль 28 ақпаннан бері Иранға әуеден соққы беріп, соның салдарынан Әли Хаменеиді қосқанда 1 340-тан астам адам қаза тапты. Иран болса Израильге, сондай-ақ АҚШ-тың әскери нысандары орналасқан Иордания, Ирак және Шығанақ елдеріне ұшқышсыз ұшу аппараттары және зымырандармен қарымта соққы берді. Бұл шабуылдар адам шығыны мен инфрақұрылымдық зақымдарға әкеп соқты, сонымен қатар жаһандық нарықтар мен авиация саласында іркіліс тудырды.
