Түркияның ұйымдастыруымен Анталияда өтіп жатқан Біріккен Ұлттар Ұйымының Климаттың өзгеруі жөніндегі негіздемелік конвенциясына қатысушы тараптардың 31-конференциясы (COP31) аясында 100-ден астам елдің министрлері қатысқан жиын өтті.
Министрдің төрағалығымен өткен Бюро отырысы конференцияның Көк аймағындағы «Босфор» залында ұйымдастырылды.
Қорытынды шешім жобасы бойынша келіссөздер басталар алдында диалогты нығайтып, ортақ келісімге келуге жағдай жасау мақсатында өткізілген төрт сағаттық жиында сөз сөйлеген Курум нақты, барлық тараптың мүддесін ескеретін және іске асыруға болатын жол картасын әзірлеу үшін диалогтың маңызды екенін атап өтті.
Министрдің айтуынша, COP31 барысында жаһандық жылынуды 1,5 градуспен шектеу мақсатына қол жеткізу мүмкіндігін сақтау, климаттық қауіп-қатерлерге төзімділікті арттыру және қабылданған шешімдердің орындалуын жеделдету мәселелері талқыланды.
Ол осы мақсаттарға жету үшін қаржыландыру, технологиялар мен әлеуетті арттыру мүмкіндіктері нақты қажеттіліктерге сай болуы керектігін айтты.
Министр бүгінгі отырыс қорытынды шешім қабылданар алдында ортақ келісімге келуге мүмкіндік беретінін атап өтті. Сондай-ақ жиында айтылған пікірлер COP31 төрағалығы өткізетін консультацияларға негіз болатынын жеткізді.
Қорытынды шешім жобасына тоқталған министр көптеген елдің ортақ ұстанымды нығайту мақсатында құжатты қолдайтынын білдіріп, өз ұсыныстары мен талап-тілектерін жеткізгенін айтты.
Барлық тараптың ортақ шешімге келгенін қалайтындарын атап өткен Курум сөзін былай жалғастырды: «Мақсатымыз – Париж келісімінде белгіленген жаһандық жылынуды 1,5 градуспен шектеу мақсатын сақтай отырып, қабылданған міндеттемелердің орындалуын жеделдету және нақты іс-қимылға басымдық беру. Бұл мәселеде дамыған елдер де, дамушы елдер де ортақ пікірде. Ендеше мәселе неде? Мәселе – басымдықтардың әртүрлі болуында, елдердің экономикалық даму мақсаттарында. Соған қарамастан, ортақ келісімге келе алатынымызға сенемін. COP31 төрағалығы атынан сіздерді осы келісімге қол жеткізуге шақырамын. Осы жерде барлық мәселені ашық талқылап, ортақ мақсатқа жету үшін не істей алатынымызды ақылдасайық. Шешім жобасын жариялаймыз және оған қатысты пікірлеріңізді күтеміз. Біз саяси тұрақтылыққа қауіп төніп тұрған қазіргі кезеңде барша тараптың келісімімен түпкілікті қорытынды шешім қабылдауды көздеп отырмыз», – деді министр Курум.





















