Түркия вице-президенті Джевдет Йылмаз Өзбекстан президенті Шавкат Мирзиёев және Өзбекстан президенті әкімшілігінің басшысы Саида Мирзиёевамен бірге Ташкент конгресс орталығында алғаш рет ұйымдастырылған Түркия мен Өзбекстан арасындағы іскерлік ынтымақтастықты қолдау жөніндегі жоғары деңгейдегі кеңестің отырысына қатысты.
Әлемдік тәртіп өзгеріп жатқан қазіргі кезеңде елдер күрделі сын-қатерлерге тап болып отырғанын атап өткен Йылмаз ешбір мемлекеттің бұл қиындықтарды жалғыз өзі еңсере алмайтынын айтты.
«Осындай кезеңде Түркия мен Өзбекстан арасындағы жоғары деңгейдегі қарым-қатынастарымыз тарихи және мәдени байланыстарымыздан да терең маңызға ие. Екі ел қатынастарының бүгінгі деңгейі халықтарымыздың жарқын әрі бақуатты болашағы үшін бізге үлкен жауапкершілік жүктейді. Біз осы берік байланыстарды өзара тиімді экономикалық серіктестікке, бірлескен инвестициялық жобаларға және стратегиялық ынтымақтастыққа айналдырғымыз келеді. Осы мақсатта өткен ай Анкарада Өзбекстан президенті Шавкат Мирзиёев пен Түркия президенті Режеп Тайып Ердоған қол қойған келісім негізінде кеңесіміз құрылды. Бұл кеңес қолданыстағы ынтымақтастық тетіктерін толықтырып, президенттеріміз белгілеген екіжақты сауда көлемін қысқа мерзімде 5 миллиард долларға, ал орта мерзімде 10 миллиард долларға жеткізу мақсатына қол жеткізуді жеделдетеді деп сенемін. Атажұртымыз Өзбекстанда жұмыс істейтін түрік инвесторлары құрған 2400-ге жуық компания және осы уақытқа дейін жалпы құны 9,5 миллиард долларды құрайтын 350-ге жуық жобаны жүзеге асырған түрік мердігерлік компаниялары экономикалық серіктестігіміздің берік негізін құрайды», – деді Йылмаз.
Түркия вице-президенті түрік инвесторларының Өзбекстан экономикасының дамуына үлес қосуын қолдайтындарын атап өтті.
Оның айтуынша, әсіресе өнеркәсіп, құрылыс, тоқыма өндірісі, энергетика, технология, ауыл шаруашылығы, азық-түлік және қызмет көрсету салаларындағы инвестицияларды арттыруға ерекше көңіл бөлінуде.





















