Бельгиядағы Флоренн әскери-әуе базасында өткен шараға қатысқан «Түрік жұлдыздары» тобы «NF-5 Freedom Fighter» ұшақтарымен шамамен 45 минуттық әуе көрсетілімін ұсынып, ұзақ уақыт әуеде қалды.
Жеті ұшақтың қатысуымен өткен көрсетілім барысында көрермендерге ағылшын, француз және түрік тілдерінде ақпарат берілді.
«Түрік жұлдыздары» мыңдаған көрерменнің ыстық ықыласына бөленді. Көрсетілім аяқталғаннан кейін ұшқыштар түрік және шетелдік қонақтармен кездесті.
Шараны Түркияның Бельгиядағы елшісі Барыш Тантекин, Түркияның Брюссельдегі бас консулы Онур Севим, сондай-ақ бельгиялық әскери лауазымды тұлғалар тамашалады.
«Аптап ыстыққа қарамастан мінсіз әуе көрсетілімі»
Бағдарлама соңында «Түрік жұлдыздары» тобы елші Тантекинге, бас консул Севимге және шараны ұйымдастыруға қатысқан әскери қолбасшыларға «Түрік жұлдыздарының» қолтаңбасы қойылған фотосуретін сыйға тартты.
Тантекин Түркия мен Бельгияның дос әрі одақтас екі ел екенін атап өтіп, екі ел арасындағы ынтымақтастықтың берік жалғасып жатқанын айтты.
Ол өткен айда Бельгия патшайымы Матильданың жетекшілігіндегі Экономикалық миссия делегациясының Түркияға барғанын еске салып, жаңартылатын энергиядан қорғаныс өнеркәсібіне, байланыс саласынан цифрлық трансформацияға дейін көптеген бағытта ынтымақтастық мүмкіндіктері талқыланғанын жеткізді.
Тантекин Түрік Әуе күштерінің мүмкіндіктері мен әлеуетін бельгиялық одақтастарға көрсетуге қуанышты екенін айтып, бұл көрсетілімнің артында ұшқыштармен қатар техник мамандар, операция және логистика бойынша мамандардан құралған үлкен ұжым тұрғанын атап өтті.
Тантекин аптап ыстыққа қарамастан мінсіз әуе көрсетілімін ұсынған «Түрік жұлдыздары» тобына алғыс айтып, Бельгияда тұратын шамамен 300 мың түрік азаматының да бұл көрсетілімді мақтан тұтқанын атап өтті.
Ол «Түрік жұлдыздары» Түркияны және ай-жұлдызды туды ең лайықты түрде танытып жүргенін атап өтіп, шараға үлес қосқан барлық адамға алғыс білдірді.
«Түрік жұлдыздарының» мақтанышқа толы мәлімдемесі
«Түрік жұлдыздары» эскадрильясының командирі, подполковник Күршат Көмүр көрсетілімнен кейін жасаған мәлімдемесінде бұл іс-шараға қатысқандарына қуанышты екендерін айтты.
Көмүр Бельгия Әуе күштерінің құрылған күніне арналған іс-шаралар аясында әуе көрсетілімін өткізгендерін атап өтіп:
«Түркия туын Бельгияда жілбіреткенімізге қатты қуаныштымыз. Мұнда әдемі көрсетілім болды», – деді.
Көмүр «Түрік жұлдыздарының» шетелдегі көрсетілімдерде Түркияны ең лайықты түрде танытуды мақсат ететінін жеткізді.
