Сүлейман Демирел университеті мен Ыспарта муниципалитеті бірлесіп 2018 жылдан бері өткізіп келе жатқан Халықаралық Шекспир фестивалі Америкалық Шекспир қауымдастығы тарапынан тарихи марапатқа ие болды.

Қауымдастықтың 54 жылдық тарихында алғаш рет АҚШ-тан тыс жобаға табысталған бұл марапат «Қоғамдық үлес» аталымы бойынша берілді. Ыспартаның мәдениет және туризм басқармасының қолдауымен өткен фестиваль мәдени және әлеуметтік ықпалы, сондай-ақ халықаралық ауқымы үшін осы құрметке ие болды.

Биыл 4-18 мамыр аралығында Ыспарта мен Анталия қалаларында алтыншы рет ұйымдастырылып жатқан іс-шара аясында театр қойылымдары, ғылыми конференциялар, салаларалық іс-шаралар өтуде. Әлемдегі ең жаңа Шекспир фестивальдерінің бірі болғанына қарамастан, ұйым 2022 жылы Польшадағы Еуропалық Шекспир фестивальдері қауымдастығына мүше болды. Сондай-ақ фестиваль Еуропалық Шекспир фестивальдері қауымдастығы тарапынан аккредитациядан өтті.

Денвер қаласында өткен марапаттау рәсімінде фестивальді ұйымдастыру комитетінің мүшесі Илкер Өзчелик бұл марапат өнер мен әдебиеттің біріктіруші күшін көрсететінін айтты. Ал Рубен Эспиноса фестивальді «жаһандық деңгейде мойындалуға лайық» деп атап, оның халықаралық форматы мен қоғамға кең ықпалын жоғары бағалады.