Иран парламентінің төрағасы Мұхаммед Бакир Галибаф “X” платформасындағы жазбасында Тегеран мен Вашингтон арасындағы атысты тоқтатуды талқылауға арналған «келіссөз жүргізуге болатын негіздің» өзі әлдеқашан бұзылғанын, сондықтан қосымша келіссөздердің «ақылға қонымды емес» екенін мәлімдеді.
Галибаф бұл бұзушылықтар Тегеранның атысты тоқтату шарттарының бұзылуына қатысты алаңдаушылығын көрсететінін және Иран мен АҚШ арасындағы кейінгі келіссөздерді қиындататынын атап өтті.
Галибаф АҚШ-тың атысты тоқтату жоспарын бұзған үш оқиғаны атады: Ливандағы шабуылдардың жалғасуы, бір ұшқышсыз аппараттың Иран әуе кеңістігіне кіруі және Иранның уран байыту құқығының мойындалмауы.
Израиль бейсенбі күні Ливанға кең ауқымды бомбалау бастады. Бұл Тегеран мен АҚШ арасындағы осал бітімнің екінші күні болатын.
Алайда Израиль көршілес Ливанда, соның ішінде халық тығыз қоныстанған астана Бейруттың орталық бөлігіне ауыр шабуыл жасады.
Ливанның Азаматтық қорғаныс қызметінің мәліметінше, Израиль шабуылдары салдарынан қаза тапқандар саны 254-ке, ал жараланғандар саны 1 165-ке жетті.
Израиль Ливанның сейсенбі күні кешке келісілген АҚШ пен Иран арасындағы бітімінің бір бөлігі емес екенін мәлімдеді. Бұл пікірді Пәкістанда Тегеранмен өтетін келіссөздерге жетекшілік етуі жоспарланған АҚШ вице-президенті Джей Ди Вэнс те айтты.
«Шынайы үміт»
Қол жеткізілген бітімнің осалдығын күшейткен тағы бір жайт бір америкалық шенеуніктің Иранның 10 тармақтан тұратын жоспары Ақ Үй соғысты уақытша тоқтату үшін қабылдаған шарттармен бірдей емес екенін айтуы болды.
Ливан астанасы Бейрутта алдын ала ескертусіз жасалған шабуылдар қорқыныш пен дүрбелең туғызды. БҰҰ-ның Адам құқықтары жөніндегі жоғарғы комиссары Фолькер Түрк Ливанда қаза тапқандар санын «жан түршігерлік» деп атаған болатын.
Иран Ислам революциясы сақшылары корпусы Израильге Ливандағы шабуылдарын тоқтатпаса, «міндетімізді орындап, жауап қайтарамыз» деп ескертті.
Бұл мәлімдемелер жұма күніне жоспарланған аса маңызды келіссөздер қарсаңында жасалды.
Хабарларға қарағанда, атысты тоқтату жалғасып жатқанына қарамастан Ормуз бұғазы қайтадан жабылған. Ақ Үй мұны «мүлде қабылдауға келмейтін жағдай» деп атады.
Иран негізгі кеме қатынасы аймағында теңіз миналары қаупіне байланысты бейсенбі күні Ормуз бұғазы арқылы өтетін кемелер үшін балама бағыттарды жариялады.
Бітімге делдал болған Пәкістанның премьер-министрі Шехбаз Шариф дипломатияның нәтиже беруі үшін барлық тарапты «сабыр сақтауға және екі апта бойы атысты тоқтату режимін бұзбауға» шақырды.
