Жастарды технология өндірушілеріне айналдыруды мақсат еткен Түркия технологиялық командасы қоры («T3») Еуропаның ең беделді ғылыми коммуникация сыйлықтарының бірін иеленіп, Түркияның жаһандық ғылым және инновация кеңістігіндегі ықпалын арттырды.
Жастарды технология өндірушіге айналдыруды мақсат еткен «T3» қоры Швецияның Гётеборг қаласында өткен 2026 жылғы «ECSITE» конференциясында «Жарқын бастама» (Bright Spark Award) сыйлығымен марапатталды. Бұл марапатты Еуропадағы ең ірі ғылыми коммуникация желісі саналатын және 50 елден 400-ден астам ғылыми орталықты, музей мен зерттеу мекемесін біріктіретін «ECSITE» ұйымы табыстайды.
Бұл сыйлық әлемнің түкпір-түкпірінен келген 900 ғылыми коммуникация маманының, музей директорларының, педагогтар мен сала өкілдерінің қатысуымен өткен «Mariano Gago Awards» марапаттау рәсімінде табысталды.
Бұл марапат «T3» қорының жастардың белсенді қатысуы мен технология өндіруін басты орынға қоятын өзіндік моделін халықаралық деңгейде мойындатты.
Қор әлемдегі ең ірі авиация және технология фестивалі «TEKNOFEST», «DENEYAP» шеберханалары, сондай-ақ кәсіпкерлік пен адам капиталын дамытуға бағытталған түрлі бағдарламалар арқылы Түркияның миллиондаған жасын технология өндіруге тартты.
«T3» қорының экожүйесі
Халықаралық қауымдастықтың назарын аударған жайт ̶ тек «T3» экожүйесінің ауқымы ғана емес, оның ұстанған қағидаты. Қор ғылымды жай ғана насихаттаумен шектелмей, жастардың технологияны өздері әзірлеуіне мүмкіндік беретін жол қалыптастырды. Бұл Еуропаның ғылыми коммуникация саласы мамандары ресми түрде мойындаған, тұтынудан өндіруге бағытталған бетбұрысты білдіреді.
Бір ғана «TEKNOFEST» бүгінде жастарға тәжірибе, білім, стартап жобаларын дамыту және озық зерттеулер жүргізу мүмкіндігін ұсынатын көпқырлы алаңға айналды. Фестиваль жыл сайын жүздеген мың қатысушыны тартып, өңірдегі көптеген елге таралып келеді.
«ECSITE» сыйлығы Түркияның ғылым мен технологияға жастарды тарту тәжірибесінің енді тек отандық жетістік қана емес, әлемдік деңгейде зерттеліп, мойындалған модельге айналғанын айғақтайды.
Марапаттау рәсімінен кейін «T3» қорының өкілдері халықаралық қатысушылармен кездесіп, қордың қызметін таныстырды. Сондай-ақ технологиялық сауаты жоғары ұрпақ тәрбиелеу тәсілінің әлемдік ғылыми коммуникация қауымдастығы үшін қандай тәжірибе ұсына алатынын талқылады.
«T3» қоры бүгінде елдің ең ықпалды жұмсақ күш құралдарының біріне айналды. Соңғы марапат әлем жұртшылығының да мұны мойындай бастағанын аңғартады.
